जळगाव प्रतिनिधी । शहरातील शिवाजी नगर भागातील गेंदालाल मिल परिसरात किरकोळ कारणावरुन एका रिक्षाचालकाने तरुणावर चाकु हल्ला केल्याची घटना १५ डिसेंबर रोजी रात्री ११.१५ वाजता घडली. याप्रकरणी रिक्षाचालकाविरुद्ध शहर पोलीस स्थानकात गुन्हा दाखल करण्यात आला आहे.
गेंदालाल मिल परिसरातील डॉ. सुरज पाटील यांच्या दवाखान्याजवळ जुबेर शेख भिकन शेख (वय १९, रा. गेंदालाल मिल) हा तरूण त्याचे मित्र लक्ष्मण भदाणे आणि अल्ताफ खान यांच्यासोबत मंगळवारी रात्री ११ वाजता गप्पा मारत बसलेला असतांना रिक्षाचालक किशोर याने त्याला कट मारला. जुबेरने याचा जाब विचारल्याचा राग आल्याने किशोरने जुबेरला शिवीगाळ करून लाथा-बुक्क्यांनी मारहाण केली. नंतर चाकुने त्याच्या डाव्या हाताचे मनगट व गळ्यावर वार केला.
यात जुबेर जखमी झाल्यानंतर रिक्षाचालक किशोर पळून गेला. यानंतर कुटुंबीयांनी जुबेर याला रुग्णालयात दाखल केले आहे. जुबेरच्या फिर्यादीवरुन रिक्षाचालक किशोर याच्या विरुद्ध शहर पोलिस स्थानकात गुन्हा दाखल करण्यात आला आहे.
