जळगाव प्रतिनिधी – जामनेर बोदवड रस्त्यावरील राजकमल हॉटेल समोर कमरेला गावठी पिस्तूल खोचून दहशत माजवणाऱ्या तरुणास स्थानिक गुन्हे शाखेच्या पथकाने बुधवारी अटक केली. अनुराग लक्ष्मण सुनगत (वय २०, रा. जामनेर) असे अटक करण्यात आलेल्या तरुणाचे नाव आहे. अनुराग हा रस्त्यावर दहशत माजवत असल्याची माहिती स्थानिक गुन्हे शाखेचे पोलिस निरीक्षक किरणकुमार बकाले यांना मिळाली होती.
त्यानुसार पोलिस उपनिरीक्षक अमोल देवढे, अशोक महाजन, लक्ष्मण पाटील, विनोद पाटील, किशोर राठोड, रणजित जाधव, श्रीकृष्ण देशमुख, ईश्वर पाटील, अशोक पाटील यांचे पथक रवाना केले. या पथकाने अनुराग सुनगत याला ताब्यात घेऊन झडती घेतली. त्याच्याकडून २० हजार रुपये किमतीची पिस्तूल मिळून आली. हे पिस्तूल पोलिसांनी जप्त केले आहे. अनुरागच्या विरुद्ध जामनेर पोलिस ठाण्यात गुन्हा दाखल करण्यात आला आहे. सुदैवाने पोलिस पथकाने वेळीच कारवाई केल्याने, संशयिताकडून गावठी पिस्तूल जप्त करण्यात यश आले.
