चाळीसगाव प्रतिनिधी । श्रीनगर येथील दहशतवादी हल्ल्यात चाळीसगाव तालुक्यातील पिंपळगाव येथील जवान यश डिगंबर देशमुख यांच्या पार्थिवावर आज सकाळी शासकीय इतमामात अंत्यसंस्कार होणार आहेत. पिंपळगाव येथील जवान यश देशमुख यांच्या पार्थिवावर आज अंत्यसंस्कार होणार आहे.
श्रीनगर येथे लष्कराच्या गस्ती पथकावर झालेल्या दहशतवादी हल्ल्यात चाळीसगाव तालुक्यातील पिंपळगाव येथील जवान यश दिगंबर देशमुख हे शहीद झाले आहेत. त्यांचे पार्थिव काल सायंकाळी ५.३० वाजता नाशिक येथे पोहचले होते. तसेच लष्कराची गार्ड टीम आज सकाळी जवान यश देशमुख यांचे पार्थिव घेऊन नाशिक येथून सकाळी पिंपळगाव येथे पोहोचणार आहे.
सकाळी १० वाजेच्या सुमारास जवान देशमुख यांच्या पार्थिवावर शासकीय इतमामात अंतिम संस्कार करण्यात येणार असल्याची माहिती भुसावळ येथील कर्नल करूण ओहरी यांनी दिली आहे.
शहीद जवान यश देशमुख यांचे पार्थिव थोड्याच वेळात त्यांच्या चाळीसगाव तालुक्यातील पिंपळगाव इथे पोहोचणार आहे. दरम्यान गावी जाणाऱ्या मार्गावर अनेक ठिकाणी फलक लावत यशला श्रद्धांजली अर्पण केली जात असून रस्त्याच्या दोन्ही बाजूला रांगोळ्या काढल्या गेल्या आहेत.
यश देशमुख गेल्या वर्षी मिल्ट्रीमध्ये भरती झाला होता. गेल्या तीन महिन्यांपासून काश्मीरमध्ये त्याची नेमणूक करण्यात आली होती. शेतकरी कुटुंबातील असलेल्या यशच्या शहीद होण्याने त्याच्या पिंपळगावसह संपूर्ण जळगाव जिल्ह्यावर शोककळा पसरली असल्याचं पाहायला मिळत आहे.
