जळगाव – जळगाव शहरातील असलेल्या छत्रपती शिवाजी महाराज स्टेडियममधील जलतरण तलावात एका तरुणाचा पोहताना बुडून मृत्यू झाल्याची धक्कादायक घटना आज रविवारी रोजी १८ जून संध्याकाळी घडली.
सलमान मो. मुर्शिद बागवान (वय २४, रा. जोशीपेठ, जळगाव) असे मयत तरुणाचे नाव असून तो जोशीपेठे येथे आई, वडील, भाऊ, तीन बहिणींसह राहत असून फळविक्री करून तो परिवाराचा उदरनिर्वाह करीत होता.
रविवारी सलमान बागवान त्याच्या मित्रांसोबत पोहण्यासाठी जलतरण तलाव येथे गेला होता. तेथे तो पोहण्यासाठी पाण्यात उतरला. मात्र त्याला पाण्याचा अंदाज न आल्याने तो बुडाला. काही वेळानंतर सलमान हा काही तरुणांना पाण्याच्या खाली तळाशी दिसला. त्याला तत्काळ बाहेर काढण्यात आले.
त्याचा मृतदेह शासकीय वैद्यकीय महाविद्यालय व रुग्णालयात आणला असता तेथे कुटुंबीयांनी व मित्रांनी आक्रोश केला. याप्रकरणी जिल्हापेठ पोलीस स्टेशनचे कर्मचारी घटनेची माहिती घेत आहेत.
