जळगाव – राष्ट्रीय स्वयंसेवक संघाचे देवगिरी प्रांत संघचालक व मूळचे भोगाव (ता. जिंतूर, जि. परभणी) येथील रहिवासी मधुकर श्रीरंग जाधव ऊर्फ दाजी (वय 62) यांचे आज शनिवार, दि. 17 एप्रिल 2021 रोजी औरंगाबाद येथे प्रदीर्घ आजाराने निधन झाले. त्यांच्यावर औरंगाबाद येथील सिडकोतील एन-6 स्मशानभूमीत सायंकाळी अंत्यसंस्कार करण्यात आले. त्यांच्यामागे आई, पत्नी, तीन मुलगे, सुना, नातवंडे असा परिवार आहे.
दाजी जाधव यांचे महाविद्यालयीन शिक्षण परभणीच्या शिवाजी महाविद्यालयात झाले. बीएसएनएलच्या अधिकारीपदावरून ते निवृत्त झाले होते. औरंगाबाद, जालना, परभणी, ठाणे, वापी येथे त्यांनी सेवा बजावली. संघाचे औरंगाबाद जिल्हा कार्यवाह, विभाग कार्यवाह, प्रांत कार्यवाह, क्षेत्रीय संपर्क प्रमुख अशा विविध जबाबदाऱ्याही त्यांनी सांभाळल्या. आध्यात्मिक पिंड, संत तुकारामांच्या जीवनकार्याचा प्रभाव असलेल्या जाधव यांचे ‘अभंगमधू’ हे पुस्तकही प्रसिध्द आहे. 2018 पासून दाजी जाधव देवगिरी प्रांताचे संघचालक म्हणून कार्यरत होते.
