मुंबई – बुधवारी होणाऱ्या कॅबिनेटच्या बैठकीत राज्यपाल नियुक्त १२ आमदारांचा प्रस्ताव येण्याची शक्यता आहे. यात अनेक दिग्गज नेत्यांची वर्णी लागण्याची शक्यता आहे. तर नुकतेच राष्ट्रवादीत प्रवेश केलेले एकनाथराव खडसे यांची विधानपरिषदेवरील वर्णी निश्चित मानली जात आहे.
मागच्या कॅबिनेट बैठकी आधी मुख्यमंत्री उद्धव ठाकरे, उपमुख्यमंत्री अजित पवार आणि महसूल मंत्री बाळासाहेब थोरात यांच्यात बैठकही देखील झाली होती. मात्र ऐनवेळी प्रस्ताव न आणण्याचा निर्णय राज्य सरकारने घेतला होता. परंतु, आता राज्यपाल नियुक्त १२ नावांना मंत्रिमंडळाची मंजूरी देऊन ती नावं मंजूरीसाठी राज्यपालांकडे पाठवली जाणार आहेत.
शिवसेनेकडून सुनिल शिंदे, माजी आमदार सचिन अहिर, माजी मंत्री मिलिंद नार्वेकर, सचिव राहुल कनाल, युवा सेना विजय आप्पा करंजकर ( जिल्हाप्रमुख ) ना.भाऊसाहेब चौधरी (संपर्कप्रमुख ) नाशिक नितिन बानगुडे पाटील, उपनेते अर्जुन खोतकर यांच्या नावाची चर्चा आहे. तर राष्ट्रवादीकडून एकनाथराव खडसे,राजू शेट्टी, श्रीराम शेटे,आनंद शिंदे,उत्तमराव जानकर,आदिती नलावडे,शिवाजी गर्जे तर काँग्रेसकडून सचिन सावंत,सत्यजित तांबे,मोहन जोशी,नसीम खान यांच्या नावाचा समावेश आहे.
