जळगाव : येथील शासकीय वैद्यकीय महाविद्यालय व रुग्णालयात स्त्री रोग व प्रसूती शास्त्र विभागात दोन महिलांच्या अंडाशयाच्या गाठीच्या यशस्वी शस्त्रक्रिया करण्यात तज्ज्ञ डॉक्टरांना यश आले आहे. यामुळे रुग्णांच्या नातेवाईकांनी समाधान व्यक्त केले आहे.
चोपडा तालुक्यातील रामपूर येथील आदिवासी समाजाच्या शेतमजूर असलेल्या ४० वर्षीय महिलेच्या पोटात दुखत असल्याने सहा महिन्यांपूर्वी खाजगीत सोनोग्राफी करण्यात आली होती. त्यात पोटात अंडाशयाला गाठ असल्याचे दिसून आले होते. मात्र दारिद्रयाची परिस्थिती असल्याने त्यांना उपचार घेता येत नव्हते. अखेर सोमवारी दि. १८ जानेवारी रोजी त्यांनी उपजिल्हा रुग्णालय, चोपडा गाठले. तेथील डॉक्टरांनी तपासून जळगावच्या शासकीय वैद्यकीय महाविद्यालय व रुग्णालयात पाठविले.
शासकीय रुग्णालयात आल्यावर स्त्रीरोग व प्रसूती शास्त्र तज्ज्ञ व विभाग प्रमुख डॉ. संजय बनसोडे यांनी महिलेची चिंताजनक झालेली प्रकृती पाहता शस्त्रक्रिया करण्याचा निर्णय घेतला. मंगळवारी १९ रोजी सदर शेतमजूर महिलेची यशस्वी शस्त्रक्रिया करण्यात आली. शस्त्रक्रियेदरम्यान वैद्यकीय पथकाला चक्क अंडाशयाला असलेली फुटबॉलच्या आकाराएवढी मोठी गाठ काढण्यात यश आले. त्या गाठीचा
आकार ३०सेमी गुणिले २० सेमी ईतका होता.
गंभीर बाब अशी की, अंडाशयाच्या गाठीच्या देठ फिरल्याने चार वेळा पिळ बसलेला होता. त्यामुळे त्या गठित रक्तस्त्राव झाला होता.त्यामुळे सदर महिलेला असह्य वेदना होत होत्या. डॉ. संजय बनसोडे व त्यांच्या वैद्यकीय पथकाने शस्त्रक्रिया करून महिलेचा जीव वाचवल्याने तिच्या नातेवाईकांनी समाधान व्यक्त केले आहे.
तर दुसऱ्या घटनेत, धरणगाव शहरातील ३८ वर्षीय महिलेच्या तीन सीझर शस्त्रक्रिया झालेल्या आहेत. या महिलेच्या पोटात देखील दुखत असल्याने वेदना जाणवत होत्या. गावाच्या आजूबाजूच्या खाजगी दवाखान्यांनी उपचारास नकार देत परत पाठवले होते. तसेच गुजरातमधील सुरत व धुळे येथील शासकीय रुग्णालयात देखील महिलेवर उपचार झाले नाही. पूर्वीच्या तीन सेझारियन शस्त्रक्रियेमुळे उपचारासाठी नकार येत होता.अखेर सोमवारी १८ जानेवारी रोजी महिलेच्या नातेवाईकांनी जळगावला आणत शासकीय वैद्यकीय महाविद्यालय व रुग्णालयाच्या स्त्री रोग व प्रसूती शास्त्र विभागात उपचाराला आणले.
स्त्रीरोग व प्रसूती शास्त्र तज्ज्ञ डॉ. संजय बनसोडे यांनी महिलेची तपासणी केली असता, तिच्या दोन्ही अंडाशयाला गाठी असल्याचे निदान झाले. तसेच तीन सीझर असल्याने शस्त्रक्रिया करणे देखील अवघड होते. तरीही डॉ.संजय बनसोडे व वैद्यकीय पथकाने जोखीम पत्करत शस्त्रक्रियेचा निर्णय घेतला. मंगळवारी दि. १९ रोजी महिलेच्या दोन्ही अंडाशयातील पू काढून टाकत गाठी नष्ट करून वैद्यकीय पथकाने यशस्वी शस्त्रक्रिया केली आहे. नातेवाईकांनी डॉक्टरांचे आभार मानले आहेत.
या दोन्ही महिला रुग्णांची प्रकृती बरी होत असून गुरुवारी २८ रोजी त्यांना डिस्चार्ज देण्यात आला आहे. शस्त्रक्रियेसाठी अधिष्ठाता डॉ. जयप्रकाश रामानंद, उप अधिष्ठाता डॉ. मारोती पोटे यांच्या मार्गदर्शनाखाली स्त्रीरोग व प्रसूती शास्त्र तज्ज्ञ व विभाग प्रमुख डॉ. संजय बनसोडे, डॉ. सोनाली मुपडे, डॉ. कांचन चव्हाण, भूलतज्ज्ञ डॉ.सचिन पाटील, डॉ. काजल साळुंखे, परिचारिका हेमलता जावळे ,सोनाली पाटील यांनी यशस्वीरीत्या शस्त्रक्रिया केल्या. यामुळे शासकीय वैद्यकीय महाविद्यालय व रुग्णालयाचा नावलौकिक वाढला आहे.