जळगाव – दिवसेंवदिवस जिल्ह्यात अवैध वाळू माफियांची दादागिरी वाढतच आहे. या वाळू माफियांवर जिल्हा प्रशासन नियंत्रण ठेवण्याचाही प्रयत्न करत आहे. गुरुवारी 3 डिसेंबर रोजी संध्याकाळी ‘दैनिकात बातमी का छापली’ असे विचारत त्याचा संताप येऊन एका वाळूमाफियाने पत्रकार अजय पाटील यांना लाथाबुक्क्यांनी मारहाण केली. या प्रकरणी तालुका पोलिस स्थानकात गुन्हा दाखल केला जाणार आहे.
जिल्ह्यात वाळू माफियांनी चांगलाच हैदोस घातला आहे. त्यांच्यावर नियंत्रण ठेवण्यामध्ये प्रशासनाला अजूनही यश आलेले नाही. शहरातील माहिती अधिकार कार्यकर्ते दीपक कुमार गुप्ता यांनी एक क्लिप व्हायरल केल्यानंतर याबाबतची बातमी वृत्तपत्रात छापून होती.
ती बातमी अजय पाटील यांनीच लावली असा समज करून संशयित भावेश पाटील उर्फ गोलू (रा. आव्हाणे ) या डंपर मालकाने आव्हाणे गावाच्या बाहेर अजय पाटील यांना मित्रासोबत कामानिमित्त बाहेर जात असताना त्यांना अडविले. त्यावेळी बातमी का छापली असे संतापात विचारले आणि शिवीगाळ करीत पोटात आणि अंगावर लाथाबुक्क्यांनी मारहाण केली आणि तो निघून गेला.
