जळगाव – २७ नोव्हेंबर रोजी राष्ट्रीय अवयवदान दिन म्हणून संपूर्ण देशात साजरा केला जातो. त्यानिमित्त छाया किडनी केअर व रिलीफ फाउंडेशन , सुखकर्ता फाउंडेशन, आनंद डायलेसिस सेंटर जळगाव आणि आर्या फाउंडेशन यांच्या संयुक्त विद्यमाने जिल्हाधिकारी कक्षात कार्यक्रमाचे आयोजन करून अवयवदान चळवळीसाठी पोषक वातावरण निर्माण करण्यात आले.
यावेळी जिल्हाधिकारी अभिजीत राऊत यांच्या हस्ते नीलिमा अहिरराव आणि विमल जोशी या किडनी दात्यांना सन्मानित करण्यात आले. तसेच महाराष्ट्र शासनाने मान्यता दिलेल्या ” अवयवदान प्रतीज्ञा ” या प्रतिमेचे ” विमोचन करण्यात आले. सुखकर्ता फाउंडेशनचे डॉ. नरेंद्र ठाकूर यांनी सर्व शासकीय कार्यालयात या प्रतिमा आगामी काळात लावणार असल्याचे देखील सांगितले. याप्रसंगी छाया किडनी केअर व रिलीफ फाउंडेशनचे किशोर सूर्यवंशी व आनंद डायलेसिस सेंटरचे डॉ. अमित भंगाळे , आर्या फाउंडेशनचे डॉ. धर्मेंद्र पाटील यांनी अवयवदान मोहिमेस गती येण्यासाठी जिल्हा प्रशासनाकडे निवेदन सादर केले,
त्यात जिल्हा स्तरावर अवयवदान समिती स्थापन व्हावी, शहरातील सर्व क्रिटिकल केअर सेंटरमध्ये मेंदू मृत जाहीर करण्यासाठी समिती कार्यान्वित होण्यासाठी निर्देश देणे , मेंदूमृत झालेल्या रुग्णाचे अवयव काढण्यासाठी परवानगी शहरातील अद्यायवत रुग्णालयास मिळावी, विभागीय अववाय प्रत्यारोपण समितेचे उपकेंद्र जळगावात व्हावे , अवयवदान संकल्पपत्र भरण्याची सुविधा सर्व वैद्यकीय महाविद्यालय , ग्रामीण रुग्णालय येथे करण्यात यावी , शासकीय वैद्यकीय महाविद्यालयात देहदानाची सुविधा सध्या उपलब्ध झाल्यामुळे त्याबाबत जनजागृती करण्याबाबत नमूद करण्यात आले आहे .
याप्रसंगी जिल्हाधिकारी अभिजित राऊत यांनी या सर्व बाबींवर सकारात्मक प्रतिसाद देत प्रशासन व सामाजिक संस्था एकत्रितपणे या मोहिमेस गती देण्याचे कार्य नक्की करतील अशी आशा व्यक्त करून अवयवदान मोहिमेस शुभेच्छा दिल्या तसेच आपल्या शरीरातील अवयव जिवंतपणी दान करून कुटुंबातील प्रिय व्यक्तीला पुर्नजन्म देणाऱ्या या दोघी महिलांचे कार्य प्रेरणादायी असल्याचे देखील जिल्हाधिकारी यांनी सांगितले. यावेळी मुसा शेख , छाया किडनी केअर व रिलीफ फाउंडेशन यांनी आभार मानले.
