जळगाव – जळगाव क्रिकेट लिग 2026 चा शानदार शुभारंभ शनिवारी सायंकाळी उत्साहात झाला. या वेळी जलसंपदा मंत्री गिरीश महाजन, माजी मंत्री सुरेश जैन, जैन इरिगेशनचे अध्यक्ष अशोक जैन यांच्यासह अनेक मान्यवर उपस्थित होते. जैन ड्रीम स्पेसेसच्या भव्य क्रीडांगणावर झालेल्या या स्पर्धेमुळे ग्रामीण भागातील खेळाडूंना मोठा मंच उपलब्ध झाल्याचे मत मान्यवरांनी व्यक्त केले.
उद्घाटन सोहळ्यानंतर झालेल्या पहिल्याच सामन्यात जामनेर सातपुडा हिरोजने पाचोरा एसकेटी योद्धाजवर 6 विकेट्सनी शानदार विजय मिळवला. नाणेफेक जिंकून हिरोज संघाने प्रथम गोलंदाजीचा निर्णय घेतला आणि तो योग्य ठरवत प्रतिस्पर्धी संघाला 114 धावांवर रोखले. रामकृष्णा राठोड याने 3 बळी घेत उत्कृष्ट कामगिरी केली,
तर शतायू कुलकर्णीनेही त्याला भक्कम साथ दिली. 115 धावांच्या लक्ष्याचा पाठलाग करताना जामनेरच्या फलंदाजांनी आक्रमक खेळ केला. प्रध्दुम महाजनने 14 चेंडूत 34 धावा करत संघाला वेगवान सुरुवात करून दिली. त्यानंतर ललित पाटील (29) आणि नाबाद क्रिशी नाथानी (33) यांच्या खेळीमुळे संघाने सहज विजय मिळवला.
या सामन्यातील उत्कृष्ट कामगिरीबद्दल रामकृष्णा राठोड याला ‘सामनावीर’ पुरस्कार देण्यात आला. विजेत्या संघाला 15 हजार रुपये, तर उपविजेत्या संघाला 8 हजार रुपयांचे पारितोषिक देण्यात आले. जळगाव क्रिकेट लिगच्या या दमदार सुरुवातीमुळे पुढील सामने अधिक रंगतदार होणार असल्याची उत्सुकता क्रीडाप्रेमींमध्ये निर्माण झाली आहे.
