जळगाव – जळगाव महापालिका निवडणुकीत मतदान होण्यापूर्वीच भारतीय जनता पक्षाने विजयी खाते उघडले आहे. प्रभाग क्रमांक 12 ब (ओबीसी महिला) मधून भाजपच्या उज्ज्वला बेंडाळे यांची नगरसेवक म्हणून बिनविरोध निवड निश्चित झाली आहे. प्रतिस्पर्धी उमेदवारांचे अर्ज छाननीत बाद झाल्याने बेंडाळे यांचा विजय सुनिश्चित झाला आहे. याबाबतची अधिकृत घोषणा निकालाच्या दिवशी करण्यात येणार आहे.
महापालिका निवडणुकीसाठी अर्ज दाखल झाल्यानंतर बुधवारी (31 रोजी) छाननी प्रक्रिया पार पडली. महापालिकेतील सहा निवडणूक निर्णय अधिकाऱ्यांकडे ही प्रक्रिया पार पडली. प्रभाग 12 ब मधून भाजपाच्या उज्ज्वला बेंडाळे यांनी उमेदवारी अर्ज दाखल केला होता. त्यांच्या विरोधात वैशाली पाटील व भारती चोपडे या दोन उमेदवारांनी अर्ज सादर केले होते.
छाननीदरम्यान भारती चोपडे यांच्या अर्जात त्रुटी आढळून आल्याने तो बाद करण्यात आला. तसेच वैशाली पाटील यांनी इतर दोन प्रभागांमध्येही अर्ज दाखल केले होते. त्यापैकी दुसऱ्या प्रभागातील अर्ज आधी दाखल झाल्याने प्रभाग 12 ब मधील त्यांचा अर्ज तांत्रिक कारणास्तव निवडणूक निर्णय अधिकारी जितेंद्र कुवर यांनी बाद ठरविला. यामुळे प्रभाग 12 ब मध्ये केवळ उज्ज्वला बेंडाळे यांचाच एकमेव अर्ज शिल्लक राहिल्याने त्यांची बिनविरोध निवड निश्चित झाली आहे.
महापालिका निवडणुकीत भाजपाला मतदानाआधीच एका जागेवर विजय मिळाल्याने पक्षात उत्साहाचे वातावरण आहे. 2 डिसेंबरपर्यंत माघारीची अंतिम मुदत असून, आणखी किती जागा बिनविरोध होतात याकडे राजकीय वर्तुळाचे लक्ष लागले आहे.
