जळगाव – शासकीय आशादिप महिला वसतीगृह, जळगाव येथील अनाथ विद्यार्थीनी लक्ष्मी विलास शिंदे हिने आपल्या जिद्दीच्या बळावर बारावीची परीक्षा यशस्वीरित्या पार केली आहे. बेंडाळे कॉलेज, जळगाव येथून आर्ट शाखेत शिक्षण घेत असलेल्या लक्ष्मीने 50% गुणांसह बारावी उत्तीर्ण केली असून, तिच्या यशाबद्दल संस्थेमध्ये आनंदाचे वातावरण आहे.
लक्ष्मीचा प्रवेश दिनांक 18 जून 2023 रोजी मुलींचे निरीक्षणगृह, जळगाव येथून शासकीय आशादिप महिला वसतीगृहात झाला होता. तिच्या जीवनात आई-वडील नसल्यामुळे ती व तिचे दोन छोटे भाऊही शासकीय संस्थांमध्ये राहत असून शिक्षण घेत आहेत. अत्यंत प्रतिकूल परिस्थितीत वाढलेली लक्ष्मी शिक्षणाबरोबरच स्वावलंबी होण्याचे स्वप्न उराशी बाळगून आहे.
पोलीस दलात भरती होण्याची तीव्र इच्छा असलेल्या लक्ष्मीला ब्युटी पार्लरचे शिक्षण घेण्याचीही आवड आहे. तिच्या या यशामागे शासकीय आशादिप वसतीगृहातील मार्गदर्शकांचे आणि कर्मचारीवर्गाचे मोठे योगदान आहे. परीवेक्षक अधिकारी सोनिया देशमुख यांनी देखील तिच्या प्रगतीवर समाधान व्यक्त केले आहे.
लक्ष्मी शिंदे हिचे यश हे इतर विद्यार्थ्यांसाठी प्रेरणादायी ठरत असून, तिच्या स्वप्नांना गती मिळावी यासाठी सामाजिक स्तरावरून पाठबळ मिळण्याची गरज आहे.
