जळगाव – दिवसा कपडे प्रेस करून लॉण्ड्री व्यवसाय अन् रात्री बंद घरांमध्ये घरफोड्या करणार्या कपिल दिलीप वाघ रा. पेंढारपुरा, पारोळा यास स्थानिक गुन्हे शाखेने शनिवारी अटक केली आहे.
पारोळा शहरातील पंचायत समितीच्या बाजूला असलेली रुद्र लॉण्ड्रीमध्ये कपडे प्रेस करणारा कपिल वाघ नावाचा तरुण प्रेस करण्याकरिता कपडे ने आण करीत असताना घरांची पाहणी करून रात्रीच्या वेळी पारोळा शहरातील बंद घर फोडत असल्याची गोपनीय माहिती स्थानिक गुन्हे शाखेचे पोलिस निरीक्षक किरण कुमार बकाले यांना मिळाली. त्यानुसार त्यांनी पोलीस हवालदार सुनील दामोदरे जयंत चौधरी दीपक पाटील प्रमोद लाडवंजारी नंदलाल पाटील किरण धनगर भगवान पाटील सचिन महाजन दीपक चौधरी अशोक पाटील यांच्या पथकाला सुचना केल्या. पथक महिनाभरापासून पारोळा तालुक्यात संशयिताचा शोध घेत होते. अखेर शनिवार १८ सप्टेंबर रोजी संशयित कपिल वाघ यास अटक करण्यात पथकाला यश आले. त्याने पारोळा शहरात केलेल्या दोन घरफोड्या बाबत कबुली दिली असून त्याच्याकडून १५ हजार रोख जप्त करण्यात आले आहे.