जळगाव, प्रतिनिधी । येथील कोंबडी बाजार परिसरातील पंकज ऑटो शोरूममध्ये रात्री ११ वाजेच्या सुमारास अज्ञात चोरटयाने लिफ्टच्या गाळ्यातून शोरूममध्ये प्रवेश करीत लॅपटॉप, मोबाईलसह किरकोळ रक्कम चोरून नेल्याची घटना आज दि. ७ रोजी सकाळच्या सुमारास उघडकीस आली. याप्रकरणी अज्ञात चोरट्यांविरुद्ध शहर पोलीस स्थानकात गुन्हा नोंद करण्याचे काम सुरु आहे.
सविस्तर माहिती अशी आहे की, शहरातील कोंबडीबाजार परीसरातील पंकज ऑटो शोरूममध्ये रात्रीच्या सुमारास अज्ञात चोरट्याने प्रवेश करीत शोरूममधील लॅपटॉप, मोबाईलसह किरकोळ रक्कम चोरी केल्याचे सकाळच्या सुमारास उघडकीस आले. तसेच तिजोरी देखिल तोडल्याचे निदर्शनास आले, मात्र यातून किरकोळ रक्कम चोरी गेल्याचे देखील निदर्शनास आले आहे. घटनेची माहिती कळताच शहर पोलीस स्थानकात सदर घटनेची माहिती कळविण्यात आली असता, पोलीस अधिकारी व कर्मचाऱ्यांनी घटनास्थळी धाव घेत पाहणी केली. दरम्यान शोरूममध्ये रात्रीच्या सुमारास प्रवेश करून चोरट्याने केलेल्या चोरीचा घटनाक्रम येथील सिसिटीव्ही कॅमेर्‍यात कैद झाला आहे. यामुळे चोरट्याची ओळख पटण्याची शक्यता पोलीस सुत्रांतून वर्तविली जात आहे.
