चितोडा, ता.यावल – गेल्या चार ते पाच दिवसापासून बेपत्ता असलेल्या एका तरुणाचा शेतातील विहिरीत मृतदेह आढळून आल्याने परिसरात खळबळ उडाली आहे. युवराज काशिनाथ कोलते (३५) असे मृत तरुणाचे नाव आहे.
सदर तरुण हा शुक्रवार (दि.२६) रोजी दवाखान्यात जातो म्हणून घरातून बाहेर पडला होता. मात्र, संध्याकाळ होऊनही युवराज हा घरी परतला नाही. गेल्या दोन दिवसापासून त्याचा शोध घेतला तरी देखील मिळून आला नाही. मात्र, आज गावाशेजारील देविदास पाटील यांच्या शेतातील विहिरीत युवराज कोलते याचा मृतदेह आढळून आला आहे. दरम्यान, त्याने आत्महत्या का केली याबाबत अद्यापही कळू शकलेले नाही. परंतु मागील काही दिवसापासून तो वेडपणा सारख करीत असल्याची चर्चा परिसरात होत आहे.
याबाबत माहिती मिळताच पोलिसांनी ग्रामीण रुग्णालयातील डॉक्टर तायडे यांना सोबत घेऊन घटनास्थळ गाठले. यावेळी मृतदेहाचा पंचनामा करण्यात आला असून याप्रकरणी यावल पोलिसांनी अकस्मात मृत्यूची नोंद केली आहे. पुढील तपास हवालदार नेताजी वंजारी हे करीत आहे.
