जळगाव प्रतिनिधी । शिरसोलीकडून जळगाव शहरात येत असतांना रोडावर बॅरिकेट्सवर दुचाकी आदळल्याने एकाचा जागीच मृत्यू झाला. ही घटना 29 मार्च रोजी सायंकाळच्या सुमारास घडली. याप्रकरणी एमआयडीसी पोलीस स्थानकात दुचाकी चालकावर गुन्हा दाखल करण्यात आला आहे.
नेरी ता. जामनेर येथील रहिवासी प्रशांत रामकृष्ण चौधरी (वय – ४०) हा जळगाव शहरातील महेश सुभाष बागुल यांच्याकडे सोनार काम करीत होता. सोमवारी २९ मार्च रोजी संध्याकाळी तो योगेश सुरेश जाधव याच्यासोबत दुचाकीने (क्र.एम.एच.१९ सी.एच.९९९०) शिरसोली येथे जेवणाला गेला होता तेथून परत येत असताना सायंकाळी पाच वाजता लुंकड कंपनी जवळ वळणावर असलेल्या बॅरिकेट्सवर दुचाकी धडकली.
त्यात मागे बसलेला प्रशांत चौधरी याच्या डोक्याला बॅरिकेट्स लागल्याने मेंदू बाहेर आला. त्यामुळे तो जागेवरच गतप्राण झाला तर योगेश जाधव हा जखमी झाला. दोघांना जिल्हा रुग्णालय दाखल केले असता वैद्यकीय अधिकाऱ्यांनी प्रशांत त्याला मृत घोषित केले. दरम्यान महेश बागुल यांच्या फिर्यादीवरून योगेश जाधव रा. जळगाव याच्याविरुद्ध एमआयडीसी पोलीस स्थानकात गुन्हा दाखल करण्यात आला आहे.
