जळगाव – चालकांनी उप प्रादेशिक परिवहन कार्यालय जळगाव यांचेकडून प्रवासी वाहतूकीसाठी परवाना घेतलेल्या जळगाव शहरातील सर्व ऑटोरिक्षा चालकांना परवाना अटीप्रमाणे प्रवासी वाहतूक करतांना मीटरप्रमाणे भाडे घेणे बंधनकारक आहे.
प्रत्येक परवाना धारक ऑटोरिक्षाला मोटर वाहन नियम 119 व 137 अन्व्ये इलेक्ट्रानिक्स मीटर असणे व ते सुस्थीतीत असणे देखील बंधनकारक आहे. कुठल्याही परिस्थीत परवाना अटींचे उल्लंघन करता येणार नाही.
सर्व ऑटोरिक्षा परवाना धारकांनी ऑटोरिक्षा फेअरमीटर कॅलिब्रेशन करुन घ्यावे तसेच प्रवाश्यांची मागणी असल्यास फेअरमीटरचा वापर करुन प्रादेशिक परिवहन प्राधिकरणाने ठरवून दिलेले ऑटोरिक्षा भाडे तक्ताप्रमाणे भाडे घेण्यात यावे. नियमांचे पालन न करणाऱ्या परवाना धारकांविरुध्द मोटर वाहन कायद्यातील तरतुदीनुसार परवाना निलबंनाची दंडात्मक कारवाई करण्यात येईल.
जळगाव शहरातील नागरिकांनीदेखील जळगाव शहरात ऑटो रिक्षाचालक मीटरप्रमाणे भाडे व प्रादेशिक परिवहन प्राधिकरणाने ठरवून दिलेली ऑटोरिक्षा भाडे आकारणी करीत नसतील तर आपण अशा ऑटो रिक्षा चालकाविरुध्द उप प्रादेशिक परिवहन कार्यालय, जळगाव कार्यालयाच्या दुरध्वनी क्र. 0257-2262619 किंवा [email protected] या संकेतस्थळावर तक्रार करावी. संबंधीत परवानाधारकाविरुद्ध कायद्यातील तरतुदीनुसार दंडात्मक कारवाई करण्यात येईल, असे प्रादेशिक परिवहन अधिकारी जळगाव यांनी एका प्रसिध्दी पत्रकान्वये कळविले आहे.
