नाशिक : रजेवर असतानाही सोनसाखळी चोरांना पकडण्याची कामगिरी करणारे पोलीस नाईक गुलाब सोनार यांना भाजपच्या वतीने आमदार प्रा. देवयानी फरांदे, महापौर सतीश कुलकर्णी, यांच्या हस्ते सन्मानित करण्यात आले.
गुन्हे शाखेत कार्यरत असलेले पोलीस कर्मचारी गुलाब सोनार हे सुट्टीवर होते. आपल्या कुटुंबासोबत पुण्याहून नाशिककडे परतत असतांना त्यांनी सराईत सोनसाखळी चोरांचा पाठलाग करून पकडले. या कामगित त्यांना पत्नी, साडू यांची मदत मिळाली. सोनार यांनी पकडलेल्या चोरांकडून दोन लाखांच्या सोनसाखळ्या आणि शस्र हस्तगत करण्यात आले.
सोनार यांच्या धाडसाचे भाजपच्या कार्यकर्त्यांनी कौतुक केलं आहे. भाजप प्रदेश सरचिटणीस तथा आमदार प्रा. देवयानी फरांदे, महापौर सतीश कुलकर्णी, यांच्या हस्ते सोनार यांना सन्मानचिन्ह, शाल, श्रीफळ आणि त्यांच्या पत्नीला साडी देऊन सन्मानित करण्यात आले. यावेळी रोहिणी नायडू, संध्याताई कुलकर्णी, द्वारका मंडळ अध्यक्ष सुनील देसाई, पूर्व विभाग सभापती श्याम बडोदे, नगरसेविका सुप्रिया खोडे आदी उपस्थित होते.
