एरंडोल – खोदकामात प्राचीन सोन्याच्या दागिण्यांसह शिक्के सापडल्याची चर्चा एरंडोल तालुक्यात व्हायरल झाल्यानंतर स्थानिक गुन्हे शाखेलाही माहिती मिळाली. त्यानुसार गुन्हे शाखेच्या पथकाने कासोद्यात धाव पुरातन सोन्याचे व चांदीचे शिक्के व दागिने मिळून 19 लाख 17 हजार 283 रुपयांचा मुद्देमाल जप्त करीत कासोदा पोलिसांच्या ताब्यात दिला आहे.
एरंडोल तालुक्यातील कासोदा येथील रहिवाशी ताराबाई गणपती समदानी यांच्या जुन्या व पडक्या घराचे खोदकाम करण्याचे काम गावातील जेसीबी चालक जितेंद्र बिरबल यादव (32), ट्रॅक्टर चालक ज्ञानेश्वर संतोष मराठे (50), संजय उर्फ सतीश साहेबराव पाटील (35, सर्व रा. कासोदा, ता.एरंडोल) आणि राहुल राजू भील (24, रा. बोरगाव, ता. धरणगाव, ह.मु.कासोदा) यांना देण्यात आले होते. घराचे खोदकाम सुरू असतांना या चार जणांना खोदकाम करतांना चांदीचे शिक्के आणि सोन्याचे दागिने मिळून आले. हे चांदीचे शिक्के सन 1905 ते 1919 कालावधीतील असून सोन्याचे दागिने सुध्दा पुरातन काळातील असल्याने ते स्थानिक गुन्हे शाखेच्या पथकाने जप्त केले. त्यांची अंदाजित रक्कम 19 लाख 17 हजार 283 रूपये किंमतीचे असल्याचे ज्वेलरी दुकानदाराकडून समजते. हे सर्व दागिने व चांदीचे शिक्के कासोदा पोलिसांच्या ताब्यात देण्यात आले आहे.
