जळगाव प्रतिनिधी । कचरा टाकण्यासाठी बाहेर आलेल्या वृद्ध महिलेच्या गळ्यातील दोन तोड्याची मंगलपोत अज्ञात चोरट्याने धूमस्टाईलने लंपास केल्याची घटना ६ रोजी सायंकाळच्या सुमारास घडली. याप्रकरणी जिल्हापेठ पोलीस स्थानकात अज्ञात चोरट्यांविरुद्ध गुन्हा दाखल करण्यात आला आहे.
शहरातील चैतन्य नगरातील भूपाळी अपार्टमेंट येथे राहणाऱ्या प्रमिला बालकीसन सोमानी (वय-७२) आपल्या परिवारासह राहतात. सोमवारी ६ सप्टेंबर रोजी सायंकाळी ५.४५ वाजेच्या सुमारास घरातील पपईचे सालटे कचरा कुंडीत टाकण्यासाठी प्रमिला सोमानी ह्या अपार्टमेंच्या खाली आल्या. पपईचे सालटे टाकल्यानंतर त्या पुन्हा घराकडे जात असतांना मागून अज्ञात दोन जण दुचाकीवरून येवून महिलेच्या गळ्यातील सोन्याची पोत लंपास केली. महिलेने आरडाओरड केली परंतू तोपर्यंत दोघे दुचाकीवरून पसार झाले होते.
याप्रकरणी प्रमिला सोमानी यांच्या फिर्यादीवरून जिल्हापेठ पोलीस स्थानकात अज्ञात चोरट्यांविरुद्ध गुन्हा दाखल करण्यात आला आहे. पुढील तपास सपोनि महेंद्र वाघमारे करीत आहे.
