जळगाव – महाराष्ट्र आरोग्य विज्ञान विद्यापीठाच्या वैद्यकीय अभ्यासक्रमाच्या परीक्षा गुरुवार दिनांक १० जून पासून सुरु झाल्या. येथील शासकीय वैद्यकीय महाविद्यालयदेखील परीक्षेचे केंद्र असून पहिल्या दिवशी गुरुवारी १० रोजी परीक्षा दोन सत्रांत सुरळीतपणे पार पडल्या. पहिल्या दिवशी प्रथम आणि द्वितीय वर्षाच्या विद्यार्थ्यांची १०० टक्के उपस्थिती राहिली.
परीक्षा १० ते २३ जून दरम्यान दोन सत्रांमध्ये प्रारंभ झाली आहे. सकाळी ९. ३० वाजता विद्यार्थ्यांना परीक्षा हॉल मध्ये घेण्यात आले. केंद्रीय निरीक्षक डॉ.एस.एस. मडावी, केंद्र प्रमुख तथा उपअधिष्ठाता डॉ. अरुण कसोटे यांनी विद्यार्थ्यांचा कोरोना नसल्याचा अहवाल पाहूनच आत प्रवेश दिला. सकाळी अधिष्ठाता डॉ जयप्रकाश रामानंद यांनी परीक्षा केंद्रावर भेट देऊन पाहणी केली. परीक्षेत अंतर्गत भरारी पथक प्रमुख डॉ. भारत घोडके यांनी विद्यार्थ्यांची वेळोवेळी तपासणी केली. जळगावच्या महाविद्यालयात चार कक्षांमध्ये हि परीक्षा घेण्यात येत असून शिस्तबद्ध नियोजन करण्यात आले आहे. कक्षामधील बैठक व्यवस्था, कोरोना प्रतिबंधनाचे नियम पाळून करण्यात आली आहे.
परीक्षा सकाळी १० ते १ आणि दुपारी २.३० ते ४.३० अशा दोन सत्रांमध्ये होत आहे. संभाव्य गैरप्रकारांवर सीसीटीव्ही व भरारी पथकाद्वारे कडक लक्ष ठेवण्यात येत आहे. परीक्षा पारदर्शकपणे पार पाडण्यासाठी पर्यवेक्षकांना परीक्षेवेळी दक्ष राहण्याच्या सूचना अधिष्ठाता डॉ जयप्रकाश रामानंद यांनी दिल्या. यावेळी वरिष्ठ पर्यवेक्षक डॉ योगिता सुलक्षणे, डॉ मोनिका युनाती, डॉ चेतन भंगाळे, डॉ गिरीश राणे, डॉ गणेश लोखंडे, प्रदीप जैस्वाल, किरण बावस्कर, विशाल दळवी आदी परीक्षा कामकाज सुरळीत पार पडण्यासाठी परिश्रम घेत आहेत.
