जळगाव – येथील शासकीय वैद्यकीय महाविद्यालय व रुग्णालयात कोरोनाच्या दुसऱ्या लाटेपासून तीन महिन्यात सुमारे ३७३ रुग्णांना महात्मा ज्योतिबा फुले जन आरोग्य योजनेअंतर्गत (MPJAY) लाभ मिळाला आहे . या योजनेंतर्गत कोरोनाबाधित रुग्ण, म्युकरमायकोसिस रुग्णांवर मोफत उपचार आणि शस्त्रक्रिया करण्यात येत आहे. तसेच आयुष्मान भारत प्रधानमंत्री जन आरोग्य योजनेतून (PM-JAY) एका रुग्णाला लाभ मिळाला आहे.
राज्य सरकारने नागरिकांना आरोग्याशी संबंधित ९७१ प्रकारच्या तपासण्या, उपचार आणि शस्त्रक्रियांसाठी दीड लाख रुपयांपर्यंतचा विमा लाभ देण्याच्या उद्देशाने जनआरोग्य योजना सुरू केली. योजना ‘महात्मा ज्योतिबा फुले जनआरोग्य योजना’ या नावाने सुरू आहे. या ‘कॅशलेस’ विमा योजनेंतर्गत गरजू रुग्णांना आरोग्य सुविधा देण्यासाठी शासकीय वैद्यकीय महाविद्यालय व रुग्णालयात सुविधा करण्यात आली.
*या रुग्णांनी घेतला लाभ*
कोरोनाच्या दुसऱ्या लाटेमध्ये शासकीय वैद्यकीय महाविद्यालय व रुग्णालय २० मार्च पुन्हा कोविड हॉस्पिटल घोषित करण्यात आले. त्यानुसार रुग्णालयात या योजनेत मार्चपासून आतापर्यंत सुमारे ३७३ लाभार्थी रुग्णांवर मोफत उपचार आणि शस्त्रक्रिया करण्यात आली. त्यात ३०६ कोरोनाबाधित आणि संशयित रुग्ण तर २८ म्युकरमायकोसीस रुग्णांची नोंदणी झाली आहे. तसेच सुमारे ३९ नवजात बालकांनी सुद्धा योजनेतून मोफत उपचार घेतला.
म्युकरमायकोसीस रुग्णांवर शस्त्रक्रिया
रुग्णालयात सध्या या योजनेव्दारे म्यूकरमायकोसिसच्या रुग्णांवर मोफत उपचार आणि शस्त्रक्रिया होत आहेत. आजाराचे गांभीर्य लक्षात घेऊन एका रुग्णावर १ ते ४ शस्त्रक्रिया कराव्या लागतात. या योजनेंतर्गत आतापर्यंत २ म्यूकरमायकोसिस रुग्णांवर यशस्वी शस्त्रक्रिया झाल्या आहेत. तसेच येत्या एक – दोन दिवसात दोन रुग्णांवर शस्त्रक्रिया करण्यात येणार असल्याचे नियोजन आहे.
अधिष्ठाता डॉ. जयप्रकाश रामानंद, महात्मा ज्योतिबा फुले जनआरोग्य योजनेचे अध्यक्ष तथा उप अधिष्ठाता डॉ.मारोती पोटे, योजनेचे सचिव तथा वैद्यकीय अधीक्षक डॉ. प्रशांत देवरे यांच्या मार्गदर्शनानुसार नोडल अधिकारी डॉ. अलोक यादव यांच्या नेतृत्वाखाली कार्यालयातील कर्मचारी माधुरी पाटील, आरती दुसाने, अभिषेक पाटील, संदीप माळी, तेजस वाघ रुग्णांच्या नातेवाईकांना मार्गदर्शन करीत आहेत.
” शासकीय वैद्यकीय महाविद्यालय व रुग्णालयात येणारे रुग्ण व त्यांचे नातेवाईक हे अधिक प्रमाणात गरीब व दारिद्र्यरेषेखालील असतात. त्यामुळे त्यांना उपचार पद्धती मोफत व्हावी यासाठी महात्मा फुले जन आरोग्य योजनेच्या माध्यमातून प्रयत्न केले जात आहेत. त्यासाठी रुग्णालयाच्या आवारात मध्यवर्ती भागात असलेल्या कार्यालयामध्ये नातेवाईकांना मार्गदर्शन केले जात आहे.”
*- डॉ.मारोती पोटे, प्रभारी अधिष्ठाता,*
शासकीय वैद्यकीय महाविद्यालय व रुग्णालय, जळगाव.
