जळगाव, – शहरातील छत्रपती शाहू महाराज सरकारी रुग्णालयात उद्या दि.५ पासून कोरोना लसीकरणाला सुरुवात होणार आहे. गुरुवारी महापौर सौ.भारती सोनवणे यांनी रुग्णालयाला भेट देत तयारीचा आढावा घेतला.
कोरोना लसीकरणाला सर्वत्र सुरुवात झाली असून उद्या दि.५ पासून मनपाच्या छत्रपती शाहू महाराज रुग्णालयात मोफत लसीकरण केले जाणार आहे. ६० वर्ष वयोगटावरील आणि ४५ ते ६० गटातील गंभीर आजार असलेल्या रुग्णांना लस दिली जाणार आहे. महापालिकेकडून लसीकरणसाठी केलेल्या तयारीचा महापौरांनी आढावा घेतला. दररोज २०० नागरिकांना लस दिली जाणार असून नागरिकांनी ऑनलाईन नोंदणी करावी, असे आवाहन प्रशासनाने केले आहे. लसीकरणाला येताना नागरिकांनी ओळखीचा पुरावा आणि ४५ ते ६० वर्ष वयोगटातील नागरिकांना ओळखीचा पुरावा आणि आपल्या आजारा संदर्भातील वैद्यकीय अधिकाऱ्यांचे प्रमाणपत्र सादर करणे आवश्यक आहे.
मनपाची तयारी पूर्ण, सुसज्ज यंत्रणा
छत्रपती शाहू महाराज कोविड लसीकरण केंद्रात सुसज्ज प्रतीक्षा आणि नोंदणी केंद्र, लसीकरण कक्ष, निरीक्षण कक्ष तयार करण्यात आला आहे. लसीकरणानंतर नागरिकांना कोणताही त्रास झाल्यास तात्काळ उपचारासाठी बेडची व्यवस्था देखील करण्यात आली आहे. रुग्णालयाच्या बाहेरील आवारात देखील शेड उभारण्यात आला असून अधिक गर्दी झाल्यास नागरिकांना त्याठिकाणी प्रतीक्षेत बसण्याची व्यवस्था आहे.
